Колледж түлектеріне диплом тапсыру салтанаты

2022 жылдың 21 маусым күні «Көкшетау» мәдениет сарайында Ж.Мусин атындағы Көкшетау жоғары қазақ педагогикалық колледжінің түлектеріне диплом тапсыру рәсімі өтті. Биылғы жылы 7 мамандық бойынша 234 түлек еліміздің ұстаздар қатарын толықтырғалы отыр. Филология ғылымдарының кандидаты, Қазақстан Педагогикалық Ғылымдар Академиясының академигі, Қазақстан Республикасының еңбек сіңірген ұстазы, Ж.Мусин атындағы Көкшетау жоғары қазақ педагогикалық колледжінің директоры Ахат Нұртас Ахатұлы түлектерге ақ жол тілеп, білікті маман, нағыз тұлға болуға шақырды. 
Үздік студент болған түлектердің ата-аналарына алғыс хат табыстады. Колледжде білімі мен парасаттылығын танытып, кәсіби мамандығына бейімі мен үздік білім нәтижесін көрсете білгені үшін «Мектепке дейінгі», «Дене мәдениеті», «Бастауыш мектеп», «Музыка» және «Информатика» бөлімдерінің үздік диплом иегерлеріне диплом табыс етті.  Сондай-ақ «Филология» мен «Ағылшын»  бөлімдерінің үздік диплом иегерлерін колледж директорының оқу жұмысы бойынша орынбасары, Педагогика және психология ғылымдарының PhD докторанты Рақымжан Әсел Қайроллақызы құттықтап, дипломдарын қолдарына ұстатты. Колледж түлектері   Жаңатілек Аружан мен Жаңатілек Аяжан «Ару сымбаты» атты би билеп, сахнада мың бұралды. Көкшетау қаласы білім бөлімінің жанындағы №38 «Сәуле» бөбекжай-бақшасының меңгерушісі Сексенова Гүлмира Сайлаубекқызы МД-41 және МД-42 қолданбалы бакалавриат топтарына, қорытынды аттестаттау комиссиясының төрағасы, Көкшетау қаласы №6 мектеп-лицейінің оқытушысы Бейсембаев Акбар Қанағатұлы ДМ – 41, М-41 топтарына диплом табыс етті. Сондай-ақ музыка бөлімінің түлегі Ануарбек Аружан және колледж оқытушысы Мұратбек Бұқарбекұлы  «Қозы Көрпеш Баян сұлу» әнін әуелете шырқады. Ұлағатты ұстаз, Білім беру ісінің үздігі, «Ыбырай Алтынсарин» төсбелгісінің иегері, педагог-шебер Төлеген Өмірбек Шаймұратұлы БМ-41, БМ-42 қолданбалы бакалавриат топтарына диплом табыстап, құттықтау сөз сөйледі. Сонымен қатар қорытынды аттестаттау комиссиясының мүшесі, Көкшетау қаласы №2 мектеп-лицейінің қазақ тілі мен әдебиеті пәнінің зерттеуші мұғалімі Кұрманова Қамар Нұрмұхамбетқызы ФБ-41 және ФБ-42 қолданбалы бакалавриат топтарына диплом табыс ету құрметіне ие болды. Ал, А-41, А-42 тобының түлектеріне Көкшетау қаласы Назарбаев мектебінің ағылшын тілі мұғалімі, практика-зерттеу тобының координаторы, деңгейлік курстарды бағалау сарапшысы Тургумбаева Балғын Каукаровна диплом табыс етті. Айта кету керек, А-41 тобының түлектері «Заманауи би» билеп, көрермен көзайымына айналды. А-43 және И-41 тобының түлектеріне Ш.Уәлиханов атындағы Көкшетау университетінің оқытушысы, жаратылыстану  ғылымдарының магистрі Айдарханова Айнаш Қазыбекқызы диплом беру құрметіне ие болды. Салтанатты рәсімде «Музыка» бөлімінің түлектері «Бақыт»  әнін орындап, жүрекке жылу сыйлай білді. Жас мамандардың кәсіптік еңбек жолына сәт сапар тілейміз!