ГІР СПОРТЫНАН ӘЛЕМ ЧЕМПИОНАТЫНЫҢ КҮМІС ЖҮЛДЕГЕРІН КОЛЛЕДЖ ҰЖЫМЫ ЗОР ҚОШЕМЕТПЕН ҚАРСЫ АЛДЫ

Ағымдағы жылдың 25 қыркүйек күні Ж.Мусин атындағы Көкшетау жоғары қазақ педагогикалық колледжінің ұжымы «Дене мәдениеті» бөлімінің 1-курс студенті, гір спортынан Әлем чемпионатының күміс жүлдегері Нұрғожин Қуанышты салтанатты түрде қарсы алды. Қуаныш 2023 жылдың 7-12 қыркүйек күндері аралығында Өзбекстанның Хива қаласында өткен гір спортынан Әлем чемпионатында топ жарып,  ауқымды спорттық додада   спорттық шеберлік пен қажымас қайраттың арқасында 2-орынды иеленді.   Әлем чемпионатының жүлдегерін қарсы алу рәсімі пресс-конференциямен жалғасты. Іс-шараға «Дене мәдениеті» бөлімінің студенттері, колледж әкімшілігі мен оқытушылары қатысты. Колледж директоры, филология ғылымдарының кандидаты, Қазақстан ПҒА академигі Ахат Нұртас Ахатұлы әлем чемпионатының күміс жүлдегерін құттықтап, алдағы дүбірлі додаларда әрқашан жеңіс тұғырынан көрінуіне тілектестік білдірді. Пресс-конференцияда спортшы  студенттерге өзінің түрлі жарыстардағы жеңістеріне тоқталып, әлем чемпионатынан алған әсерімен бөлісті. «Дене мәдениеті» бөлімінің студенттері қайсарлық, өршілдік, жоғары спорттық шеберлік және жеңіске деген құлшыныстың арқасында нәтижеге қол жеткізуге болатынына көздері жетті. Пресс-конференция соңында Әлем чемпионатының жүлдегері колледж директоры Ахат Нұртас Ахатұлы атынан Алғыс хатпен және 100000 теңгелік  сыйақымен марапатталды.