ТҮЛЕКТЕР ЛЕБІЗІ

Менің мамандығым – мұғалім. Қиындығы мен қызығы мол осы мамандықты бала күнімнен армандадым.

Әр адамның өмірі бірнеше кезеңдерден тұрады. Менің Ж.Мусин атындағы Көкшетау жоғары қазақ педагогикалық колледжіндегі оқуым өмірімдегі маңызды кезеңдердің біріне айналды. Аталған колледжде 2002-2006 жылдары білім алып, бастауыш сынып мұғалімі мамандығына ие болдым. Студенттік кездерімнің қызықты, әрі көңілді сәттері есімде сақталды. Осы төрт жылда бойымда қалыптасқан оқу қабілеті мен білім қоры бүгінгі жұмысыма көп көмегін тигізуде.

2006 жылы Зерені ауданы, №1 Зеренді орта мектебінде, 2007 жылдан бастап Зеренді ауданы, Мәлік Ғабдуллин негізгі мектебінде жұмыс істеймін. Бастауыш сынып мұғалімі ретіндегі еңбек өтілім – 14 жыл, соның ішінде директордың оқу ісінің орынбасары болып 7 жыл қызмет етіп келемін. Санатым – педагог сарапшы. Алған білімнің арқасында көптеген жетістіктерге қол жеткізіп, 2019 жылы облыстық білім басқармасының құрмет грамотасымен марапатталдым. Облыстық және Республикалық конференцияларға жиі қатысамын. 2020 жылы Алматы қаласы «Бөбек» ұлттық ғылыми-практикалық, білім беру және сауықтыру орталығының Алғыс хатымен марапатталдым. Осының бәрі колледжден алған білім мен дағдының арқасы деп ойлаймын.

Колледжде бізді шынайы өмірге дайын болуға, ақпарат теңізінде дұрыс шарлауға үйретіп, бәрінен бұрын «нағыз адам» болуға бағыттады. Бұл үшін білім нәрін берген ұстаздарыма алғысымды білдіргім келеді. Студенттердің алғысы мен жетістігі Сіздердің қиын мамандықтарыңызда шабыттандырсын және сіздерге үлкен қуаныш сыйласын! Бақыт және сәттілік әрқашан Сізбен бірге болсын! Оқу орнымыздың қабырғалары студенттерге толы болып, үнемі көркейе түссін!

Оспанова Баян Балташқызы

«Бастауыш білім беру» мамандығы, 2006 жылғы түлегі

Ақмола облысы, Зеренді ауданы, М.Ғабдуллин негізгі мектебі,

директордың оқу ісінің орынбасары