Мәлік Ғабдуллинге арналған «Адалдық сағаты» өткізілді

Ж.Мусин атындағы Көкшетау жоғары қазақ педагогикалық колледжінде «Адалдық сағаты» өткізілді. Бұл білім беру мекемесіндегі «Мектепке дейінгі тәрбие және оқыту» бөлім студенттерінің арасында ұйымдастырылды. Аталмыш игі шара Кеңес одағының батыры, жазушы, әдебиет зерттеушісі, қоғам қайраткері, филология ғылымдарының докторы, профессор, КСРО Педагогика ғылым академиясының академигі, Қазақ КСР-інің еңбек сіңірген ғылым қайраткері Мәлік Ғабдуллиннің мұрасын насихаттау, оның батырлығын, ерлігін үлгі тұту, жігітке тән тұлғалық қасиетін дәріптеу мақсатында өткізілді. Адалдық сағаты барысында Мұқышева Нұргүл Серікқызының жетекшілігімен «Мектепке дейінгі тәрбие мен оқыту ұйымдарының тәрбиешісі» біліктілігін игеріп жатқан МД-11 тобының студенттері «адалдық», «парасаттылық», «сенім» атты қасиеттермен етене танысты. «Адалдық пен әділдікті ту еткен Мәлік Ғабдуллин» атты сабақта адами құндылықтарды бойға сіңіруге қатысты ой-пікірлер айтылып, жан-жақты талданды. Білім алушыларға тақырып бойынша дайындалған презентация мен бейнефильмдер көрсетілді. Сондай-ақ «Адалдық алаңы дүкені» ұйымдастырылды. Сонымен қатар «МД-12» тобына колледж оқытушысы Аяшева Жұлдызай Сұлтанғалиқызы «Мәлік Ғабдуллиннің ерліктері» атты адалдық сағатын өткізді. Әуелі студенттер батыр тұлғаға қатысты «Өмір жолы» атты бейнеролик тамашалап, кейіннен өмірбаяны туралы толық ақпарат алмасты. Онда тақырыпқа сай презентация көрсетілді. Топ студенттері Мырзабек Айғаным мен Надырова Жұлдыз нар тұлғаға арналған арнау өлеңдерін оқып, шабыт үстінде болды. Сондай-ақ білім алушылар өз ішінен топтастырылып, Мәлік Ғабдуллиннің өмір жолының әр кезеңіне қатысты постер қорғады.