«НҰР БАЛА» БӨБЕКЖАЙЫНДАҒЫ ПЕДАГОГИКАЛЫҚ ПРАКТИКА

Ж. Мусин атындағы Көкшетау жоғары қазақ педагогикалық колледжінің «Мектепке дейінгі тәрбие мен оқытудың қолданбалы бакалавры» біліктілігі бойынша білім алатын МД-31 тобының студенттері 2026 жылғы 14–25 қыркүйек аралығында Көкшетау қаласындағы «Нұр бала» бөбекжайында педагогикалық практикадан өтуде.
Практиканың тақырыбы – «Мектепке дейінгі ұйымдағы оқу-тәрбие процесінің техникалық және әдістемелік шарттарын орындау, ұйымдастырылған іс-әрекеттерді жүргізу, балалардың іс-әрекетін жоспарлау».
Практиканың мақсаты – студенттердің теориялық білімдерін тәжірибемен ұштастыру, мектепке дейінгі ұйымдағы оқу-тәрбие үдерісінің ерекшеліктерімен таныстыру, ұйымдастырылған іс-әрекеттерді жоспарлау және өткізу дағдыларын қалыптастыру. Сонымен қатар балалардың жас және жеке ерекшеліктерін ескере отырып жұмыс жүргізу, заманауи оқыту әдіс-тәсілдерін тиімді қолдану және болашақ мамандардың кәсіби құзыреттілігін дамыту көзделеді.
Практика барысында студенттер тәрбиешілердің жұмысын бақылап, оқу-тәрбие үдерісін ұйымдастыру тәсілдерімен танысады. Балалардың түрлі іс-әрекеттерін жоспарлауға қатысып, ұйымдастырылған іс-әрекеттер өткізеді және атқарылған жұмыстарға талдау жасайды. Тәжірибелік жұмыстар студенттердің кәсіби шеберлігін жетілдіруге, шығармашылық қабілеттерін дамытуға және жауапкершілігін арттыруға мүмкіндік береді.
Студенттердің практика барысындағы жұмыстарына жетекшілік жасап, әдістемелік көмек көрсетуші – практика әдіскері Өтепбай Жансая Қанатқызы.