Монтессори технологиясы туралы түсінік

12-қаңтар күні педагогика пәнінің жоғары санатты оқытушысы, педагогика ғылымдарының магистрі, «Монтессори- педагог» сертификатының иесі Әмірова Сағира Абзалқызы сырттай оқыту бөлімінің студенттерімен кездесіп, №306 М.Монтессори кабинетінің барлық мүмкіндіктерімен, Монтессори технологиясымен таныстырды: «Мария Монтессори 1870 жылдың 31 тамызында Италияда туылып, 1952 жылы Голландияда қайтыс болды. Осы жылдар аралығында оның өмір жолы философиялық мәні бар, балалардың құқығын қорғау үшін күресі мен ұлы педагогикалық жаңалықтар ашуына толы болды. Ол Италияның тұңғыш әйел - дәрігері. Мария Монтессоридің еркін тәрбие идеяларын қуаттаушылардың бірі Константин Николаевич Вентцель (1857-1947) еді. Ол 1917 жылы дүниеде алғашқылардың бірі болып бала құқықтары декларациясын түзіп, жариялады. Монтессори өзінің еркіндік түсінігін баланың үлкендердің еркіне тәуелді болмау деп түсіндірді. Бұл дегеніміз баланың үлкендердің минималды көмегі арқылы өзіне қызмет етуі, жаңаны игере білуі, маңызды шешімді өзі қабылдауы мен баланың даралық құқығын қорғау болып табылады».