«Жүрегіңнің түбіне терең бойла» рухани сайысы

Қазақ сахарасының қайталанбас тұлғасы Абайдың 175 жылдық мерейтойы қарсаңында колледжімізде «Ақ қауырсын» поэзия клубының ұйымдастыруымен «Жүрегіңнің түбіне терең бойла» тақырыбында рухани сайыс өтті.  Рухани сайыс өткізудегі басты мақсат – Абай мұрасын жастар арасында насихаттау, студенттер арасында гуманизмнің жоғары деңгейін қалыптастыру.

«Ақ қауырсын» поэзия клубының жетекшісі Серкешбаева Гүлжанат Нұрмағанбетқызы тарапынан ұйымдастырылған мәдени шарада 17 студент өз өнерлерін ортаға салды. Абай өлеңдерін жатқа мәнерлеп оқу, «Мен және Абай» тақырыбында Абайға арналған өз шығармашылығын таныстыру, 45 қарасөзінің мазмұнын жатқа айту, әндерін нақышына келтіріп орындау сынды төрт айналымнан сайысқа түскен қатысушылар жоғары деңгейдегі дайындықтарымен көзге түсті. Абай поэзиясын нақышына келтіріп орындаудағы шеберлігі үшін филология бөлімінің 2 курс студенті Хонарбай Альбина, «Дана Абай» арнау өлеңімен сайысқа түскен ФБ-21 тобының студенті Тұрсынбек Сая, Абайдың қара сөздерін жатқа айтудан ФБ-33 тобының студенті Бақтиярова Гүлнәр, «Желсіз түнде жарық ай» әнімен ФБ-11 тобының студенті Жамилахын Алмас рухани сайыс жеңімпаздары атанып, I дәрежелі дипломмен марапатталды.