ЖЕҢІС ТҰҒЫРЫНДАМЫЗ! «WorldSkills Kazakhstan 2019» – V Республикалық кәсіби шеберлік Чемпионатында студенттеріміз 1 алтын, 1 күміс медаль еншіледі

     2019 жылдың 11 мен 15 қараша аралығында Нұр-Сұлтан қаласында «WorldSkills Kazakhstan 2019» – V Республикалық кәсіби шеберлік Чемпионаты өтті. Шараның ашылу салтанатында Білім және ғылым министрі Асхат Аймағамбетов байқау қатысушыларына сәттілік тілеп, аталған чемпионаттың еліміздің экономикасы үшін маңызы зор екендігін атап көрсетті. Биылғы жылдың ерекшелігі – 38 мамандық қатысқан Ұлттық Чемпионатта «Бастауыш сыныптарда оқыту» құзыреттілігі алғаш рет енгізіліп отыр.

        Еліміздің 17 аймағынан 400-ден астам маман қатысқан чемпионатта студенттеріміздің екеуі де жүлделі орынды иеленіп, жеңіс тұғырынан көрінді. Бастауыш мектеп бөлімінің 4 курс студенті Маджитова Лаура «Бастауыш сыныптарда оқыту» құзыреттілігі бойынша алтын медаль иегері атанып, I дәрежелі дипломмен марапатталса, «Мектепке дейінгі оқыту және тәрбие» құзыреттілігі бойынша қатысқан студентіміз Шарипова Айгерім күміс медаль иегері атанып, II дәрежелі дипломмен марапатталды.

         Конкурсқа қатысушы студенттерге жетекшілік еткен колледж оқытушылары Мукушева Қарагөз Серікқызы мен Смаилова Айгүл Тоқтауылқызының ұйымдастыру шеберліктері мен колледж ұжымының бірлескен еңбегінің арқасында бүкіл республика алдында көшбасшы оқу орындарының бірі әрі бірегейі екенімізді тағы бір мәрте дәлелдедік. Сондай-ақ, аталмыш конкурста колледжіміздің оқытушысы Әмірова Сағира Абзалқызы «Мектепке дейінгі оқыту және тәрбие» құзыреттілігі бойынша бас сарапшы ретінде жоғары кәсібилігін таныта білді. 5 модульден құралған конкурс тапсырмаларын жоғары деңгейде орындап, өздерін кәсіби құзыретті, ұтқыр, бәсекеге қабілетті болашақ маман ретінде бүкіл республика алдында мойындата білген студенттерімізбен мақтана аламыз!!!