1 қыркүйек - Білім күні!

     2019 жылдың 1 қыркүйек күні Ж.Мусин атындағы Көкшетау жоғары қазақ педагогикалық колледжінде білім күніне арналған салтанатты жиын өтті.

   Егемен еліміздің ертеңі – жас буын, бірінші курс студенттерінің қатысуымен өткен Білім күні кеңінен аталып өтілді. Мерекелік іс-шара мемлекеттік Әнұранмен басталды. Салтанатты шараны колледж директоры Н.Ахат  өзінің құттықтау сөзімен ашып, болашақ білікті мамандар үшін жасалған барлық жағдаяттардың бар екендігін, әлі де болса жетілдіре түсетіндігін атап өтті. Студенттердің ата-аналарына ыстық лебізін жеткізіп, балаларының дұрыс таңдау жасағандары үшін өз ризашылығын білдірді. Келер оқу жылында оқытушылар мен студенттер қауымына сәттілік, жаңа жетістіктер тіледі.

  Өткен оқу жылы колледж үшін айтарлықтай жетістіктерге толы жыл болды. Студенттеріміз түрлі, спорттық және әскери бағыттағы қалалық, облыстық, республикалық жарыстардың және өнер байқауларының жеңімпаздары атанып колледж мерейін асқақтатты. Атап көрсетсек, дене мәдениеті бөлімінің студенті Ерлан Игілік Монғолия Халық Республикасында өткен пауэр лифтингтен Азия чемпионы атанды. «Айбын» әскери-патриоттық клубы Қарағанды қаласы СПАСК әскери полигонында өткен V Республикалық «Айбын» әскери-патриоттық жастар жиынының жүлделі III орынына ие болды. «Айбын» әскери-патриоттық клуб мүшелері Тамыз конференциясында облыс әкімінің 200 мың теңге сыйақы сертификатымен марапатталды. Бұдан өзге колледжімізде студенттер мен оқытушыларға арналған емдік және дене массажы, «Open room» демалыс аймағы, тренажер залы, «Energy» фитнес орталығының ашылуын мақтанышпен айтуға болады. Сонымен қатар, болашақ мамандардың сапалы білім алулары үшін Абай атындағы электронды ресурстық «SMART кітапхана» 890 жаңартылған білім бағдарламасы бойынша жаңа оқулықтармен, 175 әлемдік бестселлермен және дидактикалық оқу әдебиеттерімен толықтырылғандығы атап өтілді.

    Салтанатты жиында директордың оқу жұмысы бойынша орынбасары, Рақымжанова Әсел Қайроллақызы, информатика бөліміне оқуға түскен студент Алькенова Дәнекердің ата-анасы Ботагөз Хамзақызы, биылғы оқу жылында ағылшын бөліміне қабылданған А-11 тобының студенті Фазылова Фариза сөз сөйледі. Жиын мерекелік концертпен аяқталды.

     Салтанатты шарадан соң 1 курс табалдырығын аттаған студенттер өз факультеттері бойынша бекітілген аудиторияларға барып, тәрбие сағаттарына қатысты.