«Жаңартылған білім беру аясында қазақ тілі мен әдебиеті пәнін оқытудың ерекшеліктері»

     Ағымдағы жылдың 14 наурыз күні филология бөлімінің оқытушылары Д.Ілияс, Т.Жоламанованың ұйымдастыруымен әлеуметтік серіктестік мақсатта тірек мектеппен «Жаңартылған білім беру аясында қазақ тілі мен әдебиеті пәнін оқытудың ерекшеліктері» тақырыбында семинар-практикум өтті. Мақсаты – оқыту мен оқу процесінде жаңартылған білім беру бағдарламасының тиімділігін, қазақ тілі мен әдебиеті сабақтарында қолдану әдістерін көрсете отырып, тәжірибе алмасу. Семинар-практикумге Сәкен Жүнісов атындағы №18 мектеп-лицейінің қазақ тілі мен әдебиеті пәнінің мұғалімдері, «Тіл және әдебиет» кафедрасының оқытушылары, филология бөлімінің студенттері (IV курс студенттері) қатысты. Кіріспе сөзді филология бөлімінің оқытушысы Д.Ілияс сөйлеп, модератор болды. С.Жүнісов атындағы № 18 мектеп-лицейінің қазақ тілі мен әдебиеті пәнінің мұғалімі Б. Камашева қазақ әдебиеті пәнінен 6-сынып оқушыларымен Сайын Мұратбеков «Жусан иісі» повесі тақырыбында шеберлік сабақ берді. Қазақ тілі мен әдебиетті оқыту әдістемесі пәндерінің оқытушысы, тренер Т.Жоламанова «Жаңартылған білім беру бағдарламасы: ерекшеліктері, жоспарлау тәсілдері» тақырыбында сөйледі. С.Жүнісов атындағы №18 мектеп-лицейінің қазақ тілі мен әдебиеті пәнінің мұғалімі Ж.Нурмуканова «Жаңартылған білім беру жүйесіндегі критериалды бағалау» тақырыбында сөйледі. Филология бөлімінің IV курс студенттері тарапынан сұрақтар қойылып, ой бөлісті. Семинар-практикумды қорытындылау мақсатында Д.Ілияс кері байланыс өткізіп, қорытындылады. Тірек мектеппен бірлесе отырып өткізілген семинар-практикум өте жоғары деңгейде ұйымдастырылып, қазіргі кездегі сабақ үрдісінде маңызы бар проблемалық мәселелер талқыланып, жан-жақты қарастырылды. Студенттер үшін пайдалы отырыс болды.